حکومت آسٹریلیا سیریز کی سیکیورٹی کے لیے پاک فوج کی مدد طلب کرے گی

ذرائع کا کہنا ہے کہ تاریخی سیریز کے لیے سیکیورٹی کے انتظامات مکمل کر لیے گئے ہیں جس کے مطابق پولیس اہلکاروں کے ساتھ فوج بھی تعینات کی جائے گی۔4 مارچ سے شروع ہونے والے پہلے ٹیسٹ میچ کے دوران پنڈی کرکٹ اسٹیڈیم سے ملحقہ تمام شاپنگ مالز اور مارکیٹیں بند رہیں گی۔ ذرائع نے بتایا کہ ٹیموں کے سفر کے دوران بعض علاقوں میں موبائل سروس بھی معطل رہے گی۔

 راولپنڈی میں سیکیورٹی کے لیے 4 ہزار سے زائد پولیس اہلکار تعینات کیے جائیں گے۔

 آسٹریلوی ٹیم 27 فروری کو 3 ٹیسٹ، 3 ون ڈے اور ایک ٹی ٹوئنٹی کھیلنے آئے گی۔

 پاکستان کرکٹ بورڈ سیریز کو کامیاب بنانے کے لیے بھرپور کوششیں کر رہا ہے کیونکہ آسٹریلیا تقریباً 24 سال بعد ملک میں کھیلنے آرہا ہے اور یہ دورہ پاکستان میں بین الاقوامی کرکٹ کی مکمل بحالی کے لیے بھی اہم ہے۔

 گزشتہ سال نیوزی لینڈ نے سیکیورٹی خدشات کے باعث راولپنڈی میں پہلے میچ کے آغاز سے چند منٹ قبل پاکستان کا دورہ ترک کر دیا تھا جبکہ انگلینڈ دورہ پاکستان سے دستبردار ہو گیا تھا۔