خلیج ٹائمز کے مطابق پریزیڈنشل فلائٹ کے ذریعے ان کی ابوظہبی آمد پر اماراتی امور خارجہ اور عالمی تعاون کے وزیر شیخ عبداللہ بن زید النہیان نے ان کا ایئر پورٹ پر استقبال کیا۔
ہیرزوگ نے امارات کی تیزی سے ترقی کی تعریف کرتے ہوئے کہا کہ میں امارات میں اسرائیلی صدر کی حیثیت سے پہلے دورے پر آرہا ہوں۔ متحدہ عرب امارات کے وزیر خارجہ کی جانب سے ابوظہبی میں عالیشان استقبال سے ہمیں خوشی ہوئی اور ہم بہت متاثر ہوئے ہیں۔
اسرائیلی صدارتی دفتر کا اس دورے کے بارے میں کہنا تھا کہ اسرائیلی صدر آئزک ہیرزوگ تاریخ میں اپنی نوعیت کے پہلے دورے پر خلیجی ریاستوں کے ساتھ تعلقات کو بہتر کرنے کے لیے امارات گئے ہیں.
واضح رہے کہ اسرائیلی صدر ایک ایسے وقت امارات کا دورہ کررہے ہیں جبکہ خطے میں بہت زیادہ کشیدگی ہے اور عالمی طاقتیں ایران کے جوہری معاہدے کو بحال کرنے کی کوششیں کر رہی ہیں۔
دوران فلائٹ بیان دیتے ہوئے اسرائیلی صدر کا کہنا تھا کہ بلا شبہہ یہ بہت اہم لمحہ ہے۔ متحدہ عرب امارات آمد پر اسرئیلی صدر اور خاتون اول کا شاندار استقبال کیا گیا جس پر انہوں نے خوشی کا اظہار کیا، جس کے بعد صدر آئزک ہیرزوگ نے شیخ عبداللہ سے سفارتی سطح کی ملاقاتیں کی۔