اسرائیل کے سیکورٹی امور کے ماہر: قدس فورس کے کمانڈر جنرل قاآنی کے خطے کے مختلف دورے تشویشناک ہیں۔ سلیمانی کا جانشین شام، لبنان، عراق، خلیج فارس اور بحیرہ احمر کے معاملات میں مصروف ہے۔ اس کی طاقت بڑھتی جا رہی ہے اور اپنی مالی بنیاد مضبوط کر کے وہ مختلف محاذوں کے درمیان رابطے برقرار کر رہا ہے۔
یاد رہے ایرانی قدس فورس کے سربراہ قاسم سلیمانی کی تین جنوری کو ایک امریکی فضائی حملے میں جاں بحق ہونے کے بعد اس فورس کی ذمہ داری جنرل اسماعیل قاآنی کو سونپ دی گئی ہے۔
قدس فورس کیا ہے؟
قدس فورس ایران کے 'اسلامی انقلاب ' کے تحفظ کی ذمہ دار ایرانی پاسداران انقلاب کا ذیلی گروہ ہے جس کی ذمہ داری بیرون ملک ایرانی مفادات کا تحفظ کرکے انقلاب کے تحفظ کو یقینی بنانا ہے جب کہ بیت المقدس (فلسطین) کو آزاد کرانا بھی تنظیم کا بنیادی ہدف ہے۔
گذشتہ 20 سالوں میں قدس فورس نے جنرل قاسم سلیمانی کی قیادت میں متعدد آپریشن اور اہداف پورے کیے جس میں فلسطینی عسکریت پسندوں اور لبنان کی حزب اللہ کی مدد ، عراق میں ایران نواز حکومت کے قیام میں کردار اور داعش اور القاعدہ جیسے گروہوں کے خلاف کارروائیاں شامل ہیں۔
قدس فورس نے شام میں بشارا لاسد کے خلاف ہونے والی بغاوت کے بعد اسد حکومت کو بچانے میں بھی اہم کردارادا کیا اور داعش اور حکومت مخالف شامی گروہوں کے خلاف لڑائی میں حصہ لے کر شام میں ایران کے اثر رسوخ کو مزید بڑھانے میں مدد دی۔