کشیدگی بڑھتے ہی اسرائیل نے غزہ پر فضائی حملے کیے

 غزہ سٹی - اسرائیل نے جمعہ کے روز جنگی طیاروں سے محصور غزہ کی پٹی پر حملہ کیا، جس میں اسلامی جہاد گروپ کے ایک کمانڈر اور ایک نوجوان لڑکی سمیت کم از کم 10 افراد ہلاک ہو گئے۔

 گروپ نے بتایا کہ اسلامی جہاد کے عسکری بازو القدس بریگیڈ کے کمانڈر، تیسیر الجباری غزہ شہر کے وسط میں واقع فلسطین ٹاور کے ایک اپارٹمنٹ پر فضائی حملے میں ہلاک ہو گئے۔

 غزہ میں وزارت صحت نے بتایا کہ الجباری اور ایک پانچ سالہ بچی سمیت کم از کم 10 افراد ہلاک ہوئے۔ اسرائیلی حملوں کے نتیجے میں کم از کم 55 افراد زخمی ہوئے اور ہسپتالوں میں زیر علاج ہیں۔

 غزہ شہر میں عمارت کی ساتویں منزل سے دھواں نکلا۔ شہری دفاع کی ٹیمیں جائے وقوعہ پر پہنچ گئیں تاکہ لوگوں کو نکالا جائے اور حملے سے لگنے والی آگ پر قابو پالیا جائے۔