تحریک حماس کی عسکری شاخ القسام بریگیڈز کے فوجی ترجمان ابو عبیدہ نے کہا ہے کہ گزشتہ چار دنوں کے دوران حماس کی فورسز نے 62 اسرائیلی فوجی گاڑیوں کو ناکارہ بنا دیا ہے۔
انہوں نے مزید کہا کہ القسام بٹالین کے جنگجو بیت حانون میں ایک عمارت کو تباہ کرنے میں کامیاب ہو گئے جہاں گزشتہ روز اسرائیلی خصوصی دستے جمع تھے۔
ابو عبیدہ نے بیان کیا کہ حماس کے جنگجو میدان میں ہیں اور ایک گلی سے دوسری گلی تک دشمن کے فوجیوں اور گاڑیوں کا پیچھا کر رہے ہیں۔
انہوں نے کہا کہ حماس نے خود کو ایک طویل جدوجہد کے لیے تیار کر لیا ہے اور قابض افواج غزہ میں جتنا زیادہ قیام کریں گی ان کے نقصانات میں اضافہ ہو گا۔
ابو عبیدہ نے کہا کہ قابض حکومت کے فوجی بچوں اور شہریوں کے خلاف اپنے جارحانہ جرائم کا سلسلہ جاری رکھے ہوئے ہیں۔
القسام بٹالین کے ترجمان نے اس بات پر زور دیا کہ القسام کے جنگجوؤں نے قابض حکومت کے فوجیوں کو کئی محاذوں سے پسپائی پر مجبور کر دیا ہے۔
ابو عبیدہ نے الشفا ہسپتال کے احاطے میں اسرائیلی فوجیوں کے داخلے کو عالمی برادری کے لیے ایک سکینڈل قرار دیا۔
فلسطین کی اسلامی مزاحمتی تحریک حماس نے 7 اکتوبر کو فلسطین پر سات دہائیوں سے زائد عرصے سے جاری قبضے اور غزہ کے تقریباً دو دہائیوں کے محاصرے اور ہزاروں فلسطینیوں کو قید و بند اور اذیت دینے کے ردعمل میں آپریشن شروع کیا۔